Takaisin
 15.5.2020

Rávvagiid čuovvumiin juohkehaš sáhttá eastit koronavirusa leavvama

Dieđáhus 13.5.2020
Lappi guovlohálddahusvirgedoaimmahat

Lappi areála válmmašvuođadoaibmagotti mielde koronavirusdilli Lappis orru leame ráfálaš. Lappi buohccedikšunbires buohccedivššus eai leat koronapasieanttat ja Länsi-Pohja buohccedikšunbiresge dilli orru váidume. Máŋggain Lappi eiseváldeorganisašuvnnain váldodeaddu barggus sirdásišgoahtá koronas dasa, ahte ráhkkanišgohtet dulvái. Lappi válmmašvuođadoaibmagoddi čoahkkimasttii gaskavahku miessemánu 13. beaivve.

Giitu lappilaččaid vásttolaš doaimmaide, koronavirusdilli Lappis orru váidut. Skuvlalaččat máhccet lagašoahpahussii miessemánu 14. beaivve ja olgovaláštallanbáikkit rahppojuvvojit (10 olbmo čoahkkananráddjehusain). Dikšunruovttuid visttiid siste eai ávžžut galledit. Vai galledeapmi lea vejolaš, gárgehuvvojit ođđa meannudanvuogit gieldda njoammudávdaeiseválddiid rávvagiid mielde. Juohkehaš bastá eastit koronavirusa leavvama lagaš ja eará olbmuide, go čuovvu rávvagiid, doallá dorvogaskka ja fuolaha giehtahygieniijas. Aktiivvalaš testema bokte gávdnet vejolaš njoammumiid ja sáhttet botket njoammunbálgáid. Ulbmilin lea, ahte Lappis besset eallit dábálaš, goittotge koronavásttolaš, árgga nu fargga jo vejolaš.

Válmmašvuođadoaibmagoddi lea fuolas das, ahte Lappi oarjeráji rasttildeaddji johtolat lea lassánan. Riikkavuložiin lea johtalanluomusvuođa lassin vuođđovuoigatvuohta heakka ja dearvvašvuođa suodjái, man dihte rádjejohtolaga ráddjehusaid leat árvvoštallan vealtameahttumin dálá pandemiijadilis. Ruoŧa bealde njoammumat leat eanet go Suoma Lappis. Juos ii leat bággu johtit ráji rastá, johtima berre garvit doaisttážii, daningo juohke ođđa mátki lasiha riskka njoammudit virusa.

Lappi guovlohálddahusvirgedoaimmahat lea addán máŋggaid mearrádusaid doaibmaguovllustis

"Leat addán maŋemuš vahku áigge mearrádusaid badjel 10 olbmo álbmotdilálašvuođaid gieldimis gitta miessemánu loahpa rádjái, ja mearrádusaid, mat gusket árrabajásgeassima, vuođđooahpahusa ja eará oahppolágádusaid sajiide ja daid geavaheapmái dihto eavttuiguin. Miessemánu áigge lea vuordimis, ahte oažžut Dearvvašvuođa ja buresbirgejumi lágádusas rávvagiid earret eará sis'sajiid dorvvolašvuođas ja areálalaččat ráddjejuvvon olgosajiid dorvvolašvuođas dilálašvuođaid lágidettiin", muitala Lappi guovlohálddahusvirgedoaimmahaga bajimuš hoavda Kaisa Ainasoja.

Oktavuođaváldimat ja jearaldagat mearrádusain leat boahtán valjis. Mearrádusaid ja rávvagiid birra dieđihuvvo guovlohálddahusvirgedoaimmahaga neahttasiidduin ja dávjá jerron jearaldagat –oassi dievasmahttojuvvo olles áigge. Maiddái riŋgenbálvalus doaibmá.

Lappi dulvedilli soaitá ložžet– dilli sáhttá goittotge rievdat

Dán iđida dulveeinnostusat orrot čájeheame, ahte Lappi stuorradulveuhkki soaitá ložžet. Einnostusat vuođđuduvvet eanaš dálkedihtui, nappo einnostusa sihkkarvuohta lea luohtehahtti dušše guovtti vahkkui. Daningo alimus dulveboddu orošii leame Kemi- ja Ounasjogas ja Duortnosjogas easka mánotbaji geažes, nappo geassemánu vuosttaš ja nuppi vahkus, dilli sáhttá vel rievdat ollu ja stuorradulvi riska lea ain leahkime. Danin dulveriskaguovlluid olbmot galget čuovvut dárkilit dulvedieđiheami ja ráhkkanit iežaset giddodagaid suddjemii.

Dán rádjái dahkkon ráhkkaneapmi addá buriid reaidduid maiddái boahttevaš jagiide. Ovdamearka dás lea Avvilis ja Durdnosis dahkkojuvvon dulvebáŋkkaid bajideapmi.

Lappi areála válmmašvuođadoaibmagoddi

Guovlohálddahusvirgedoaimmahaga lágas ásahuvvon bargun lea heivehit oktii iežas guovllus ráhkkaneami ja lágidit dasa laktáseaddji oktasašdoaimmaid, heivehit oktii válmmašvuođaplánema ja doarjut gielddaid válmmašvuođaplánema. Geavadagas dát mearkkaša earret eará áigeguovdilis dieđuid juohkima, oktasaš Lappi areála áigeguovdilis dili ja ipmárdusa duddjoma, areála resurssaid geavaheamis soahpama, áššedovdiveahkki ja doaimmaid oktiiheiveheami, ja oppalohkái guovllu dásis koordinerema, vai sáhttet garvit badjálagaid doaibmama.

Lappi válmmašvuođadoaibmagoddái gullet Jeagárbrigáda, Lappi áibmofámut (su. Lapin lennosto), Lappi rádjegozáhus, Lappi boleslágádus, Suodjalanboles, Oulu heahteguovddáš, Tornio duollu, Lappi EJB-guovddáš, Lappi lihttu, Lappi buohccedikšunbire, Länsi-Pohja buohccedikšunbire, Roavvenjárgga searvegoddi, Yle Roavvenjárga, SRR (su. Suomen punainen risti) Lappi bire, Erillisverkot Oy, Napapiirin Energia ja Vesi, MPK/Davvi-Suoma eatnanbealuštusbire, Davvi-Suoma ELVAR-doaibmagoddi ja Lappi gielddaid ovddasteaddjit.

Dasa lassin válmmašvuođadoaibmagoddái gullet čállit ja dieđihanjuogus, masa leat čohkkejuvvon Lappi guovllu guovddáš eiseválddiid ja doibmiid dieđujuohkima ámmátolbmot.

Čuovvovaš areála válmmašvuođadoaibmagotti čoahkkin lea gaskavahku 20.5.2020 dmu 10.

Lassedieđut Lappi guovlohálddahusvirgedoaimmahagas:

badjehoavda Kaisa Ainasoja, tlf. 0295 017 345, kaisa.ainasoja(at)avi.fi

oahpahus- ja kulturdoaibma -suorggi jođiheaddji Kaisa Post, tlf. 0295 017 355, kaisa.post(at)avi.fi

vuođđobálvalusat, vuoigatvuohta ja lobit -suorggi jođiheaddji Kristiina Poikajärvi tlf.. 0295 017 375, kristiina.poikajarvi(at)avi.fi

gádjundoaibma ja ráhkkaneapmi -suorggi jođiheaddji Joni Henttu, tlf. 0295 017 364, joni.henttu(at)avi.fi

Lassedieđut Lappi dulvviid birra:

ELY-guovddáža jođiheaddji čáhcedoalloáššedovdi Alaraudanjoki Timo, tlf. 295 037 282, timo.alaraudanjoki(at)ely-keskus.fi        

Lappi gádjunhoavda Markus Aarto, tlf. 040 4844000, markus.aarto(at)lapinpelastuslaitos.fi

Lassedieđut buohccedikšunbiriin:

Lappi buohccedikšunbire jođiheaddji njunušdoavttir Jukka Mattila, p. 050 572 6277, jukka.mattila(at)lshp.fi

Länsi-Pohja buohccedikšunbire jođiheaddji njunušdoavttir Jyri J. Taskila tlf. 040 352 1097, jyri.taskila(at)lpshp.fi

Buorit neahttagáldut koronavirusa birra:

Dearvvašvuođa ja buresbirgejumi lágádusa neahttasiiddut www.thl.fi

Dávjá jerrojuvvon koronavirusjearaldagaide vástádusat ee. guovlohálddahusvirgedoaimmahagaid neahttasiidduin www.avi.fi


Buorit neahttagáldut, mat laktásit dulvesuodjaleapmái:

Dulvekártábálvalus

Birashálddahusa dulvesuodjalanráva

Lappi gádjunlágádusa dulvesiiddut

Filbma iešheanalaš ráhkkaneamis dulvviid várás

 

Päivitetty: 7.11.2018 22:05

 Ajankohtaista