Takaisin
 23.4.2020

Korona áitá ain servodaga

Dieđáhus 22.4.2020
Lappi guovlohálddahusvirgedoaimmahat

Koronavirusnjoammumiid mearri lea ain oalle uhcci, muhto áitta ii leat jávkan. Lagaškontávttaid galgá dás duohkoge garvit. Oktasaš doaimmaid bokte, degomat doallamiin fysalaš gaskka ja ráddjemiin johtima, leat ožžon čielga bohtosiid, ja leat ožžon virusnjoammunmeriid bissut uhccin. Lappi giđđadulvvi alimus boddu šaddá dáláš einnostusaid mielde miesse-geassemánu sulaid. Lappi areála válmmašvuođadoaibmagoddi muittuha giddodagaid oamasteddjiid das, ahte sis lea ovddasvástádus fuolahit iežaset dulvesuodjaleamis.

Lappi buohccedikšunbires leat vahku áigge gávdnon ovttaskas koronavirusdáhpáhusat, Länsi-Pohjas njoammunbálgát leat dieđus. Vaikko Ruoŧas eai leat boahtán njoammumat mearkkašahtti ollu, rabas bargomátkejohtolat fuolastuhttá Oarje-Lappis. Dikšunbáikkiin áicojuvvon koronanjoammumat čuvvojuvvojit intensiivvalaččat. Davvi-Suoma testenkapasiteahtta stuorru olles áigge, muhto ii leat vuos Dearvvašvuođadikšunlágádusa ávžžuhan dásis. Suodjedárbašat gávdnojit doarvái doaisttážii. Lappi guovlohálddahusvirgedoaimmahaga koordineren areála válmmašvuođadoaibmagoddi čoahkkana juohke gaskavahku dmu 10.

Lappi guovlohálddahusvirgedoaimmahat lea čohkken guovllu gielddain dieđuid sosiálafuolahusa bálvalusain. Stuorámus oassi vástideddjiin oaivvildit, ahte bálvalusat doibmet dábálaččat ja sadjásaččat leat leamaš doarvái. Bearašveahkaválddi ja gárrenávdnasiid geavaheami lassáneapmi fuolastuhttet.

 

Giddodaga oamasteaddjis lea ovddasvástádus dulvesuodjaleamis – eiseválddit dorjot rávvagiid bokte ja dorvvastit almmolaš huksehusaid ja infrastruktuvrra

Lappis eiseválddit ja gielddat ráhkkanit aiddobáliid stuorra giđđadulvviide, mat soitet boahtit. Dáláš einnostusaid mielde vearrámusat dulvi áitá Gihttela ja Roavvenjárgga. Lappi EJB-guovddáš ja gádjunlágádus leaba ovttas Suoma birasguovddážiin ráhkadan dulvekárttaid ja doaibmabidjoávžžuhusaid iešguđetlágan dulvediliid várás. Gaskaboddosaš dulvesuodjeráhkadusaid lassin gádjunlágádus ja gielddat leat ráhkkanan pumpet sujiid čađa golgi čázi dain báikkiin, mat gáibidit earenoamáš suodjalusa.

 Gádjunlágádus muittuha buot giddodaga oamasteddjiid sin ovddasvástádusas:

"Muhtun veardde dihttojit feaillalaš dieđut, danin háliidan deattuhit, ahte gávpot/gielda dahje gádjunlágádus ii boađe gádjut ovttaskas olbmuid giddodagaid juos boahtá stuorra dulvi, leš sáhka bearašdálus dahje viessofitnodagas. Almmolaš huksehusaid ja infrastruktuvrra suodjaleamis lea garra bargu. Beaivválaš bargguid lassin dulvesuodjaleapmi váldá gádjuneiseválddiid buot resurssaid duon áigge. Dárkkis dál ovddalgihtii iežat dáhkádusaid dan várás juos bohtet dulvevahágat", muittuha válmmašvuođahoavda Ari Soppela Lappi gádjunlágádusas.

Soppela mielde Lappi eiseválddit ráhkkanit buoremus lági mielde ja ovttasbarget aktiivvalaččat. Eiseválddit beavttálmahttet dieđiheami, go dulveeinnostusat dárkkálmahttojuvvojit. Ovdamearkka dihte huksenplastihkaid gánnáha fitnat oastime ruovdegávppiin ja pumppaid sáhttá jearahit huksenmašiinnaid láigohanbáikkiin. Gádjunlágádus viggá rávvet ja doarjut spesiálajoavkkuid, mat eai lagašbirrasis oaččo dan veahki, maid dárbbašivčče go ráhkkanit iešheanalaš suodjaleapmái.

Dulveguovlluid lappilaččaid ávžžuhitge dál čuovvut aktiivvalaččat guovllu media ja eiseválddiid dieđiheami fáttás. Geahča filmma iešheanalaš ráhkkaneamis: https://youtu.be/CII4YsFpt_A

Lappi areála válmmašvuođadoaibmagoddi

Guovlohálddahusvirgedoaimmahaga lágas meroštallojuvvon bargun lea heivehit oktii iežas guovllus ráhkkaneami ja lágidit dasa laktáseaddji oktasašdoaimmaid, heivehit oktii válmmašvuođaplánema ja doarjut gielddaid válmmašvuođaplánema. Geavadagas dát mearkkaša earret eará áigeguovdilis dieđuid juohkima, oktasaš Lappi areála áigeguovdilis dili ja ipmárdusa duddjoma, areála resurssaid geavaheamis soahpama, áššedovdiveahkki ja doaimmaid oktiiheiveheami, ja oppalohkái guovllu dásis koordinerema, vai sáhttet garvit  badjálagaid doaibmama.

Lappi válmmašvuođadoaibmagoddái gullet Jeagárbrigáda, Lappi áibmofámut (su. Lapin lennosto), Lappi rádjegozáhus, Lappi boleslágádus, Suodjalanboles, Oulu heahteguovddáš, Tornio duollu, Lappi EJB-guovddáš, Lappi lihttu, Lappi buohccedikšunbire, Länsi-Pohja buohccedikšunbire, Roavvenjárgga searvegoddi, Yle Roavvenjárga, SRR (su. Suomen punainen risti) Lappi bire, Erillisverkot Oy, Napapiirin Energia ja Vesi, MPK/Davvi-Suoma eatnanbealuštusbire, Davvi-Suoma ELVAR-doaibmagoddi ja Lappi gielddaid ovddasteaddjit.

Dasa lassin válmmašvuođadoaibmagoddái gullet čállit ja dieđujuohkinjuogus, masa leat čohkkejuvvon Lappi guovllu guovddáš eiseválddiid ja doibmiid dieđujuohkima ámmátolbmot.

Čuovvovaš areála válmmašvuođadoaibmagotti čoahkkin lea gaskavahku cuoŋománu 29. Beaivve 2020.

 

Lassedieđut Lappi guovlohálddahusvirgedoaimmahagas:

bajimuš hoavda Kaisa Ainasoja, tlf. 0295 017 345, kaisa.ainasoja(at)avi.fi
gádjundoaibma ja ráhkkaneapmi -suorggi hoavda Joni Henttu, tlf. 0295 017 364, joni.henttu(at)avi.fi

Lassedieđut Lappi gádjunlágádusas:

válmmašvuođahoavda Ari Soppela, tlf. 040 834 2431, ari.soppela(at)lapinpelastuslaitos.fi

Buorit neahttagáldut koronavirusa birra:

Dearvvašvuođa ja buresbirgejumi neahttasiiddut www.thl.fi

Dávjá jerrojuvvon koronavirusjearaldagaide vástádusat ee. Guovlohálddahusvirgedoaimmahaga neahttasiidduin www.avi.fi

Buorit neahttagáldut, mat laktásit dulvesuodjaleapmái:

Lappi gádjunlágádusa dulvesiiddut

Birashálddahusa dulvesuodjalanráva

Päivitetty: 7.11.2018 22:05

 Ajankohtaista

Tiedostot

No content found