Takaisin
 30.12.2021
uutiskuva

Lappi buresbirgenguovllu mearrádusdahkan vuođđuduvvagoahtá nana demokratiijai

​Lappi buresbirgenguovllu gaskaboddosaš válmmaštallandoaibmaorgána lea addán evttohusa buresbirgenguovllu politihkalaš jođihanvuogádagas. Sáhka lea easka evttohusas mii gieđahallojuvvo giđđat vel buresbirgenguovllu guovlostivrras. Ođđa stivra álggaha barggustis njukčamánu álggus.

Politihkalaš organisašuvnnas alimus mearridanválddi geavaha guovlostivra masa gullet 59 lahtu. Lappilaččat válljejit guovlostivrra ođđajagimánu guovloválggain. Eará lágas gáibiduvvon doaimmat leat guovlohálddahus masa boađášedje 13-15 lahtu, dárkkistanlávdegoddi (13-15 lahtu), guovloválgalávdegoddi (5 lahtu), sámegiela lávdegoddi (11-13 lahtu) sihke nuoraid-, vuorrasiid-, ja lápmásiidstivrrat.

Dáid lassin evttohuvvojit golbma lávdegotti, main juohkehaččas livččii 11-13 lahtu. Evttohuvvon lávdegottit livčče buresbirgen- ja ovttasbargolávdegoddi, gádjun- ja gearggusvuođalávdegoddi ja osolašvuođa- ja áššehaslávdegoddi. Buresbirgen- ja ovttasbargolávdegoddi vástidivččii buresbirgema, dearvvasvuođa ja dorvvolašvuođa ovddideamis sihke ovttasbarggus gielddaiguin ja eará čanastatjoavkkuiguin. Osolašvuođa- ja áššehaslávdegoddi ovddidivččii ássiid váikkuhanvejolašvuođaid. Dan vuolde doaimmašii oktagasáššiid ossodat, mas 5-7 lahttu. Ossodat gieđahalašii ovttaskas olbmuide guoski sode-bálvalusaid mearrádusaid ja njulgengáibádusaid. Gádjun- ja gearggusvuođalávdegoddi vástidivččii gádjundoaimmas ja buresbirgenguovllu ráhkkanan- ja gearggusvuođaáššiin.

Lávdegottiid lassin vuođđuduvvošii buresbirgenguovllu ja gielddaid ráđđádallangoddi mas livččii ovddasteaddji juohke gielddas, Lappi lihtus ja Sámedikkis. Ráđđádallangotti buresbirgenguovllu ovddastivččii buresbirgen- ja ovttasbargolávdegoddi sihke guovlohálddahusa, guovlostivrra, osolašvuođa- ja áššehaslávdegotti ja sámegiela lávdegotti ságajođiheaddjit. Ráđđádallangottis livččii mieldeorrun- ja hállanvuoigatvuohta ee. buresbirgenguovlohoavddas, gielddahoavddas ja eatnangoddehoavddas.

Sámegiela lávdegotti lahttomearis ja doaimmain ráđđádallojuvvo ovttas Sámedikkiin. Lávdegotti lahttut galget leat sámegielagat. Unnimustá 40 proseantta lávdegotti lahtuin galgá nammaduvvot Sámedikki ja Nuortalaččaid siidačoahkkima evttohan olbmuin nu, ahte siidačoahkkin lea evttohan dáin ovtta olbmo.

Gaskaboddosaš válmmaštallandoaibmaorgána, vate (suom. väliaikainen valmistelutoimielin), mii lea čohkkejuvvon virgeolbmuin, lea válmmaštallan luohttámušorgánaide guoski evttohusa čavga ovttasbarggus buresbirgenguovllu politihkalaš čuovvunjoavkkuin. Vate ságajođiheaddji Jari Jokela mielde evttohussii gávdno nana doarjja politihkalaš čuovvunjoavkkus ja stuorámus bellodagaid biireorganisašuvnnain.

Go lávdegottit leat eanet go okta, sihkkarastojuvvo ahte bargomearri ii čoggo beare ollu guovlohálddahussii eandalit álggus, go mearridanvuloš áššit leat eanet go dábálaččat. Dasa lassin lávdegottiid meriid ja govttolaš stuorra lahttomeriid bokte lea vejolaš sihkkarastit ahte luohttámušolbmot leat mielde olles geográfalaččat viiddis guovllus.

Lávdegottit leat evttohuvvon go dain sáhttet leat áirasiid lassin maiddái eará olbmot. Ovdamearkan váljagottiin sáhttet leat dušše áirasat. Dál evttohuvvon málles dušše bealli lávdegotti lahtuin galggašedje leat áirasat dahje várreáirasat ja njuolggadus ii guoskkašii oppanassiige guovloválgalávdegoddái dahje sámegiela lávdegoddái.

Vate válmmaštallá ovttasbarggus politihkalaš čuovvunjoavkkuin boahttevaš stivrii evttohusa maiddái hálddahusnjuolggadusas, mas meroštallojuvvo dárkkibut sihke politihkalaš doaibmaorgánaid ja jođiheaddji virgehálddašeaddjiid barggut ja ovddasvástádusat.

Lassedieđut
gaskaboddosaš válmmaštallanorgána ságajođiheaddji Jari Jokela, jari.jokela@lshp.fi, 040 532 3998

Tiedote suomeksi samasta aiheesta: Aluevaalit lähestyvät - mistä niissä äänestetään? (21.12.2021)


Päivitetty: 7.11.2018 22:05