Sámegielaid oahpahus ja sámegielat oahpahus
Sápmelaččain lea eamiálbmogin vuoigatvuohta ovddidit ja bajásdoallat iežaset giela ja kultuvrra. Láhkaásaheapmi dorvvasta sámi mánáid vuoigatvuođa sámegielaid ja sámegielat oahpahussii. Soađegili gieldda davvioassi, Vuohčču, gullá sámiid ruovttuguvlui. Dál Vuohču skuvllas lea davvisámegielat luohkká ja davvisámegielat giellalávgunluohkká ja doppe fállet davvisámegiela oahpahusa vierisgiellan. Sámegielaid oahpahusas ja sámegielat oahpahusas lea maid nanu sajádat girkosiiddas. Girkosiiddas Tähtikunta skuvllas fállet davvisámegielat giellalávgunoahpahusa ja davvisámegiela oahpahusa vierisgiellan.
