Vuorrodikšu

Vuorrodikšu ii gula subjektiivvalaš árrabajásgeassinvuoigatvuođa ollái. Váhnemat sáhttet ohcat mánáidasaset árrabajásgeassinbáikki vuorrodivššus, juos sii leat vuorrobarggus dehe sin oahput leat eahkedis. Mánás lea vuoigatvuohta oažžut vuorrodivššu, juos divššu dárbbaha árgan dii 18—6.00 ja/dehe vahkkoloahpas.

Vuorrodivššu vuođđun lea jeavddalaš dárbu, mii šaddá váhnemiid barggus dehe studeremis. Juos nuppástusat barggu dehe studerema ektui dagahit, ahte vuorrodivššu dárbu nohká, máná dikšosaji sáhttá lonuhit nuppi dikšobáikái, mii vástida dárbui.

Vuorrodivššu ordnema prinsihpat

Soađegilis leat mearridan árrabajásgeassima vuorrodivššus (čuvgehuslávdegoddi 25.2.2021) čuovvovaš ládje:

• Vuorrodikšu lea árrabajásgeassima beaivedikšu ja/ dehe vahkkoloahppadikšu gaskkal dii 18.00–6.00.
• Vuorrodikšui lea vuoigatvuohta dušše dain mánáin, geaid divššu dárbu vuođđuduvvá goappáge fuolaheaddji dehe oktasašdállodoalus ássi dehe áidna fuolaheaddji jeavddalaš vuorrobargui, ámmáhii studeremii dehe vihkkedallama mielde buohcuvuhtii laktáseaddji dárbui.
• Vuorrodikšui ii leat subjektiivvalaš vuoigatvuohta. Vuorrodivššu dárbu árvvoštallojuvvo bearraša dili mielde. Vuorrodivššus mánáid dikšoáiggit vuođđuduvvet fuolaheddjiid bargovuoruide. Mánáid dikšoáigi lea nappo fuolaheaddji bargoáigi + bargomátkkit.
• Go dárbu vuorrodikšui nohká, mánná sirdašuvvá eret vuorrodikšojoavkkus ja mánáide ordnejuvvo dárbbu mielde árrabajásgeassinsadji nuppi ovttadagas. Vuorrodikšojoavkkuin dikšojuvvojit dušše mánát, geat dárbbašit vuorrodivššu.
• Vuorrodikšu lea oaivvilduvvon mánáide, geat dárbbahit vuorrodivššu jeavddalaččat (vahkkosaččat), ja geaidda lea ráhkaduvvon vuorrodikšui guoski dikšosoahpamuš.
• Fáhkkes vuorrodivššu sáhttá fállat dušše, juos beaiveruoktu lea rabas daid mánáid várás, geat dárbbahit jeavddalaččat vuorrodivššu, iige dat dagat bargiid bargovuoruide nuppástusaid.
• Fuolaheaddjit galget almmuhit mánáideaset plánejuvvon dikšoáiggiid ja friddjabeivviid, maid sii ovddalgihtii dihtet, ovddalgihtii nu árrat go vejolaš mobiilaáppain, mii geavahuvvo árrabajásgeassimis, goittotge maŋimustá vahku ovdal sotnabeaivve dii 24.00 rádjái. Máná dikšoáigi lea váhnemiid oktiiheivehuvvon bargoáigi. Vejolašvuođaid mielde vuhtiiváldojuvvojit almmuhusat/nuppástusat, mat bohtet almmuhanáiggi maŋŋá. Dikšoáiggiid várrema nuppástusaid, mat bohtet ovdalis namuhuvvon áiggi maŋŋá, sáhttá vuostáiváldit dušše, juos namuhuvvon áigodagas lea várrejuvvon bargi/bargit ja joavkkus lea sadji vuhtiiváldimiin stáhtaráđi ásahusa árrabajásgeassimis 753/2018 § 1 mielde mánáid ja bargiid gaskasaš gorrelogu.
• Mánná sáhttá leat divššus álo, go goappašagat váhnemat leaba barggus ja maiddái idjavuoru maŋŋá dan botta go váhnemat oađđiba, eanemustá dii 16.00 rádjái.
• Juos mánná lea eret, de das ferte almmuhit dalán máná dikšojovkui. Juos mánná ii buktojuvvo vahkkoloahpas dikšui dalle go lea almmuhuvvon, iige mange ládje almmuhuvvo ahte mánná lea eret, divššár vuordá beaiveruovttus 30 minuhta, man maŋŋá dikšovárren gávnnahuvvo fámohuvvan ja divššár sáhttá vuolgit.
• Vuosttas mánát bohtet iđđes vuorrodikšojovkui dii 5:30. Mánáid, geat eai báze idjadikšui, galgá viežžat dii 22.30 rádjái. Mánát, geat dárbbahit idjadivššu, bohtet dikšui maŋemustá 20.30. Spiehkkaseaddji boahtin- ja viežžanáiggiin ráđđádallojuvvo iešguđege bearrašiin sierra.
• Fuolaheddjiid luopmo- ja friddjabeaivvit leat maid máná ovddu mielde máná friddjabeaivvit, eaige dat atte vuoigatvuođa vuorrodikšui. Vuorrodivššu mánáide ávžžuhuvvo ordnet gaskamearálaččat gávcci friddjabeaivvi mánus. Juos nubbi vánhemiin lea buohcuvuođaluomus, máná dikšoáiggit čuvvot dan váhnema bargoáiggiid, guhte lea barggus. Juos mánná oassálastá árrabajásgeassimii, go fuolaheaddjis lea friddjaáigi (friddjabeaivi, luopmu, buohcuvuođaluopmu), dat ávžžuhuvvo dáhpáhuvvat árgan gaskkal dii 8–16.
• Iđitbihttá guossohuvvo vuorrodivššus daidda mánáide, geaidda dikšu lea várrejuvvon 8.30 rájes dehe árabut. Beaiveborran guossohuvvo daidda mánáide, geain lea divššu dárbu gaskkal dii 11.00–11.30. Gaskabihttá guossohuvvo dii 14.00–14.30. Eahkesbeaimállásat guossohuvvojit daidda mánáide, geaid dikšoáigi joatkašuvvá dii 17.00 maŋŋá. Eahkesbihttá guossohuvvo dii 20.00.