Takaisin
 16.4.2020

Velge ii leat rivttes áigi vuolgit Lappii

Dieđáhus 15.4.2020
Lappi guovlluhálddahusdoaimmahat

Lappi koronavirusdilli lea seilon viehka seammaláganin mannan vahku ektui, árvvoštallá Lappi guovllu válmmašvuođadoaibmagoddi čoahkkimisttis 15.4.2020. Ođđa sihkkaraston koronavirusnjoammumat leat gávdnon Lappi ja Länsi-Pohja buohccedikšunbiiriin beaivválaččat, muhto njoammunbálgáid leat bastán čielggadit. Ruoŧa rádjá ii leat vel orron leamen mearkkašahtti dahkki njoammunbálgáin. Uusimaa sirrema nohkama eai bala dagahit radikála nuppástusaid Lappi njoammunmeriin, lea goit dehálaš ahte buohkat bissot ruovttus ja čuvvot rávvagiid. Lappi giđđadulvviide ráhkkanuvvo, muhto daid ollašuvvamii váikkuhit giđa dálkkit.

Lappis eiseválddit leat joatkán ráhkkanandoaimmaid ja válmmašvuohta nu koronavirusepidemiija dikšumii go oktasašbargui dulvedilis lea buorre. Dilli orru stáđásman ja luohttámuš boahttevuhtii gávdno ain. Eiseválddiid rávvagiid čuovvun lea ain dehálaš. Luohtehahtti diehtu koronavirusis gávdno earet eará Dearvvasvuođa ja buresveadjima lágádusa fierbmesiidduin www.thl.fi ja dávjá jerrojuvvon koronavirusgažaldagaide vástádusat leat čohkkejuvvon ee. guovlluhálddahusdoaimmahagaid fierbmesiidduide www.avi.fi

Lappi gielddat leat váldán atnui ođđa vugiid ordnet bálvalusaid
Lappi gielddaid sosiálafuolahusa ráhkkaneami oasil dilli lea ráfálaš. Atnui leat váldon ođđa vuogit ordnet bálvalusaid. Riskabearrašat ja badjel 70-jahkásaččat leat geahččaluvvon fáhtet aktiivvalaččat dárbbašlaš doarjjabálvalusaid ordnema dihte.

Koronaviruskriisa joatkašuvvan váikkuha maiddái psyhkalaš kriisagierdannákcii.

"Jos epidemiijadilli joatkašuvvá guhkit áigge, dat sáhttá lasihit dorvvuhisvuođa ja áŧestusa erenomážit olbmuin, geain leat juo ovddežis ovdamearkka dihte mielladearvvasvuođaváttut. Lappi gielddat leat váldán atnui maiddái dán suorggis gáiddusbálvalusaid, maiguin geahččaluvvo eastadit ja geahpedit guhkesáigge noađuheaddji dili váikkuhusaid", muitala Lappi guovlluhálddahusnjunušdoavttir Sari Kemppainen.

Lappi gielddaid fierbmesiidduin gávdno lassediehtu ja oktavuođadieđut guđege gieldda bálvalusaide.
 
Uusimaa sirrema burgin ii rievdat dili – lagaškontávttaid ja dárbbašmeahttun johtima galgá ain garvit

Lappi guovllu válmmašvuođadoaibmagoddi árvvoštallá, ahte otne dáhpáhuvvan Uusimaa sirrema nohkan ii boađe dagahit stuorra váikkuhusaid Lappi dillái. Turismaguovddážat leat gitta, nu ahte vejolaš johtin lea jáhkkimis ovttaskas bargomátkejohtolat ja olbmuid johtin iežaset barttaide.

Válmmašvuođadoaibmagoddi goit muittuha, ahte buot suopmelaččat galget garvit dárbbašmeahttun johtima fuolakeahttá Uusimaa sirrema nohkamis. Epidemiija lea easkka álggus Suomas ja erenomážit Lappis.

"Ráddjehusat ja eiseválderávvagat leat fámus jáhkkimis vel guhká. Lagaškontávttaid garvimiin, buriin giehtahygieniijain ja ruovttus bissumiin váikkuhat juohkeokta koronavirusa leavvamii. Dávda sáhttá leat váralaš geasa beare, nuba virusa leavvama gánnáha eastit buot vejolaš vugiiguin", muittuha Lappi guovlluhálddahusdoaimmahaga gádjundoaibma ja ráhkkaneapmi -vástusuorggi hoavda Joni Henttu.

Son lokte ovdan maiddái koronavirusdáistaleami positiivvalaš beliid:

"Oktasaš rahčamat ja fysalaš kontávttaid garvin oidno: influensanjoammumat leat uhcit ovddit jagiid ektui ja beassášáigi lei buohcceviesuin hui ráfálaš. Dat lea buorre mearka."
 
Lappi guovllu válmmašvuođadoaibmagoddi

Guovlluhálddahusdoaimmahaga lágas mearriduvvon bargu lea ráhkkaneami oktiiheiveheapmi guovllustis ja dasa laktáseaddji ovttasdoaibmama ordnen, válmmašvuođaplánema oktiiheiveheapmi ja gielddaid válmmašvuođaplánema doarjun. Geavadis dát oaivvilda earet eará dilledieđuid juohkima, oktasaš Lappi guovllu dillegova ja -ipmárdusa hábmema, guovllu resurssaid geavaheamis soahpama, áššedovdiveahki ja doaimmaid oktiiheiveheami, sihke oppalohkái guovlodási koordinašuvnna, vai badjálasvuođaid sáhtášii garvit.

Lappi válmmašvuođadoaibmagoddái gullet Jääkäriprikaati, Lapin lennosto, Lappi rádjegozáhus, Lappi gádjunlágádus, Lappi boleslágádus, Suojelupoliisi, Oulu heahteguovddáš, Durdnosa tuollu, Lappi ELY-guovddáš, Lappi lihttu, Lappi buohccedikšunbiire, Länsi-Pohja buohccedikšunbiire, Roavvenjárgga searvegoddi, Yle Rovaniemi, SPR Lappi biire, Erillisverkot Oy, Napapiirin Energia ja Vesi, MPK/Davvi-Suoma eatnanbealuštusbiire sihke Davvi-Suoma ELVAR-doaibmagoddi.

Lassin válmmašvuođadoaibmagoddái gullet čállingoddi sihke diehtojuohkinjuogus, masa leat čohkkejuvvon Lappi guovllu guovddáš eiseválddiid ja doaibmiid diehtojuohkima ámmátolbmot.

Guovllu válmmašvuođadoaibmagotti čuovvovaš čoahkkin lea gaskavahko cuoŋománu 22. beaivve 2020.

Lassediehtu Lappi guovlluhálddahusdoaimmahagas:

Joni Henttu, gádjundoaibma ja ráhkkaneapmi -vástusuorggi hoavda, t. 0295 017 364
Sari Kemppainen, guovlluhálddahusnjunušdoavttir, t. 0295 017 350

Loga vástádusaid dábálaš gažaldagaide korona birra guovlluhálddahusdoaimmahaga fierbmesiidduin:
UKK - Koronavirus COVID-19

Loga lasi dulvesuodjalanrávvagis Birashálddahusa fierbmebálvalusas.

Päivitetty: 7.11.2018 22:05

 Ajankohtaista